સુરતમાં ફસાયેલા પરિવારને સ્પેશિયલ ફ્લાઈટથી હોંગકોંગ લાવાયો

8

સુરત
કોરોના અને લોકડાઉનના કારણે છેલ્લા ૪ મહિનાથી સુરતના કતારગામમાં પોતાના સાસુ-સસરાના ઘરે ફસાયેલા રિચા ખુંટ અને તેના બે બાળકો માટે સોમવારનો દિવસ ખૂબ જ મહત્વપૂર્ણ હતો. રિચા મુંબઈથી પોતાના હોંગકોંગમાં રહેતા હીરા વેપારી પતિ બિપિન ખુંટ પાસે જવા ફ્લાઈટમાં બેઠી. આ ફ્લાઈટમાં માત્ર રિચા માટે જ નહોતી. અંદાજે ૧૨૫ પરિવારના ૩૨૬ લોકો આ ફ્લાઈટથી હોંગકોંગમાં સ્થાયી થયેલા પોતાના પરિવાર પાસે જઈ રહ્યા હતા. તેમાંથી મોટાભાગના મહિલાઓ અને બાળકો હતા. સોમવારે મુંબઈથી હોંગકોંગ જતી પ્રાઈવેટ ચાર્ટર્ડ ફ્લાઈટ બોઈંગ-૭૭૭ની વ્યવસ્થા પણ હીરો ઉદ્યોગપતિઓએ કરાવી હતી.

રિચા કહે છે, હું આ સમયની મારી લાગણીને દર્શાવી શકતી નથી. છેલ્લા ચાર મહિનાઓથી હું અને મારા બાળકો હોંગકોંગ પહોંચવા માટે આ દિવસની રાહ જોતા હતા. અમે ફેબ્રુઆરીમાં કતારગામમાં અમારા સાસુ-સસરાના ઘરે રહેવા આવ્યા હતા, પરંતુ લોકડાઉન અને સતત કેન્સલ થતી ફ્લાઈટના કારણે હોંગકોંગ પાછા નહોતા જઈ શક્યા. હોંગકોંગના હીરા ઉદ્યોગપતિ વિજય શેઠે જણાવ્યું કે, મહિના પહેલા અમે અમારા પરિવારને હોંગકોંગમાં પાછા લાવવાનું મિશન શરૂ કર્યું. સુરતથી ૩૨૬ પરિવારના સદસ્યોને પાછા લાવવામાં પ્રાઈવેટ ચાર્ટર્ડ ફ્લાઈટ માટે હોંગકોંગ અને ભારતની સરકાર પાસેથી મંજૂરી લેવા ઘણા પ્રયાસો અને કલાકોનો પરિશ્રમ લાગ્યો.

આખરે અમને પરમીશન મળી ગઈ અને અમે મુંબઈથી હોંગકોંગ માટે બોઈંગ-૭૭૭ ફ્લાઈટ બૂક કરાવી. શેઠ કહે છે, લોકડાઉનના કારણે હોંગકોંગમાં ફ્લાઈટ હજુ શરૂ નથી થઈ તેઓ માત્ર સ્પેશિયલ કેસમાં જ મંજૂરી આપે છે. હોંગકોંગની સરકારે સુરતથી આવતા ૩૨૬ પેસેન્જરો માટે ૧૪ દિવસના ક્વોરન્ટાઈનની સુવિધા કરી રાખી છે. જેમાં તેમને ભોજન, દવાઓ અને અન્ય જરૂરી મેડિકલ સુવિધાઓ આપવામાં આવશે.

Share This: